خواطر رمضانية ٢٣

القضايا الاجتماعية من أخطر الأشياء اللي ممكن تهد أو تبني أي مجتمع، وبالذات قضايا الأسرة وعشان كدة الإسلام و القرآن إهتم بها جداً وفصل في أحكامها بشكل كبير!

ويمكن من أهمها قضايا الطلاق لأن النفوس البشرية بيبقى صعب أوي عليها ضبط النفس عند الخلافات، وغالباً كلنا بلا إستثناء يا إما مر بظروف كدة أو على الأقل يعرف حد مر بالظروف دي! وللأسف أغلب القصص دي غالباً بيكون فيها حد مظلوم وفي أحيان كتيرة بتكون الست!

الواحد بيسمع قصص وبيبقى فعلاً مش فاهم هي ازاي الناس دي هتقابل ربنا بالجرائم دي!

انهاردة هكلمك على آية في سورة البقرة أقل حاجة ممكن تتقال عنها إن فيها تحذير شديد أوي وتذكرة كبيرة لأي رجل مش عايز يطلق وعايز يفضل معلق مراته عشان يقرفها…

قال تعالى (وَإِذَا طَلَّقْتُمُ ٱلنِّسَآءَ فَبَلَغْنَ أَجَلَهُنَّ فَأَمْسِكُوهُنَّ بِمَعْرُوفٍ أَوْ سَرِّحُوهُنَّ بِمَعْرُوفٍۢ ۚ وَلَا تُمْسِكُوهُنَّ ضِرَارًۭا لِّتَعْتَدُوا۟ ۚ وَمَن يَفْعَلْ ذَٰلِكَ فَقَدْ ظَلَمَ نَفْسَهُۥ ۚ وَلَا تَتَّخِذُوٓا۟ ءَايَٰتِ ٱللَّهِ هُزُوًۭا ۚ وَٱذْكُرُوا۟ نِعْمَتَ ٱللَّهِ عَلَيْكُمْ وَمَآ أَنزَلَ عَلَيْكُم مِّنَ ٱلْكِتَٰبِ وَٱلْحِكْمَةِ يَعِظُكُم بِهِۦ ۚ وَٱتَّقُوا۟ ٱللَّهَ وَٱعْلَمُوٓا۟ أَنَّ ٱللَّهَ بِكُلِّ شَىْءٍ عَلِيمٌۭ) عدوا معايا كدة الآية فيها كام تحذير :

1- ومن يفعل ذلك فقد ظلم نفسه

2- ولا تتخذوا آيات الله هزواً

3- واذكروا نعمت الله عليكم

4- وما أنزل عليكم من الكتاب والحكمة يعظكم به

5- واتقوا الله

6- و اعلموا أن الله بكل شيءٍ عليم

ازاي بجد حد يسمع كل الكلام ده ويجيلو قلب يعمل كده!!!