خواطر رمضانية ٢٦
لما يكون عندك شركة مثلاً وعايز تعين حد يدير الشركة لازم تبص على مواصفات معينة تكون متوفرة في الشخص ده… بس إيه هي أهم الصفات دي؟
أول حاجة لازم يكون الشخص ده عنده الكفاءة المطلوبة للوظيفة، ودي اللي القرآن سماها ب “القوة” سواء كانت القوة بدنية أو عقلية.
تاني حاجة لازم يتحلى بها الشخص دة هي الأمانة، لأنك لازم تعرف تستأمن الشخص دة وتثق فيه عشان الشغل يمشي، ودي القرآن سماها ب”الأمانة” .
وبالتالي القرآن جمع بين الصفتين دول زي ما غالباً الكتير مننا يعرف في موضعين في القرآن:
- الواقعة الأولى لما بنت الرجل الصالح في مدين وصفت سيدنا موسى بعد ما ساعدها هي وأختها في سقيا الماء، فقال تعالى (قَالَتْ إِحْدَىٰهُمَا يَٰٓأَبَتِ ٱسْتَـْٔجِرْهُ ۖ إِنَّ خَيْرَ مَنِ ٱسْتَـْٔجَرْتَ ٱلْقَوِىُّ ٱلْأَمِينُ)
- الواقعة الثانية لما عفريت من الجن قال لسيدنا سليمان إنه يقدر يجيب عرش ملكة سبأ، فقال تعالى ( قَالَ عِفْرِيتٌۭ مِّنَ ٱلْجِنِّ أَنَا۠ ءَاتِيكَ بِهِۦ قَبْلَ أَن تَقُومَ مِن مَّقَامِكَ ۖ وَإِنِّى عَلَيْهِ لَقَوِىٌّ أَمِينٌۭ)
لحد هنا وغالباً كتير مننا عارف اللي أنا قلته
بس إيه هي أخطر وأهم وظيفة ممكن تتوجد في الكون دة كله؟ لا شك إن أهم حاجة هي الرسالة الخاتمة ( القرآن) اللي ربنا نزلها على سيدنا محمد صلى الله عليه و سلم، واللي هي تعتبر المنهج الإلهي للبشرية حتى قيام الساعة، وبالتالي الشخص أو الكائن الموكل إليه نقل وتعليم هذه الرسالة لازم يكون في مواصفات استثنائية!
عايزين نستشعر عظمة سيدنا جبريل عليه السلام، اللي كان ينزل بالقرآن من تحت عرش الرحمن من فوق سبع سموات إلي الأرض على قلب سيدنا محمد صلى الله عليه و سلم متخطياً مليارات السنين الضوئية في كم ثانية بس!
طب تعالوا نشوف ربنا وصفه بإيه في سورة النجم والتكوير:
- القوة – (عَلَّمَهُۥ شَدِيدُ ٱلْقُوَىٰ ذُو مِرَّةٍۢ فَٱسْتَوَىٰ) وهي تشمل كلاً من القوة البدنية ورجاحة العقل
- الأمانة – (ذِى قُوَّةٍ عِندَ ذِى ٱلْعَرْشِ مَكِينٍۢ مُّطَاعٍۢ ثَمَّ أَمِينٍۢ) قوة تاني و الأمانة
إيه الجمال دة
