خواطر رمضانية ٥

حالياً في تقريباً ٨ مليار بني آدم عايشين على الأرض! عمرك فكرت في كام إنسان عاش من وقت سيدنا آدم وكم واحد لسة هيعيش لحد يوم القيامة؟ طب بلاش دية، فى كام نملة موجودة دلوقتي، وكام نحلة وكام عصفورة وكام فيل وكام زرافة وكام… وكام… وكام؟ 

طب عمرك فكرتي في كام نجم وكام كوكب و كام حباية رمل في الكون؟ 

نخش بقى على عالم الأسماك  في كام قرش و كام درفيل و كام حوت؟ وأخيراً عالم الأشجار! 

يا ترى في كام شجرة موز وتفاح وخوخ… معلش أصل أنا بموت في الفاكهة ومحروم منها دلوقتي… الحمدالله

إيه اللي خلاني أدوشكم بالكلام دة كله؟! 

الصراحة آية في سورة الشعراء من ساعة ما أخدت بالي منها وهي بتجنني!

(أَوَلَمْ يَرَوْا۟ إِلَى ٱلْأَرْضِ كَمْ أَنۢبَتْنَا فِيهَا مِن كُلِّ زَوْجٍۢ كَرِيمٍ) وسبحان الله موضوع الأعداد دة حاجة تاخد العقل بجد!!! ولما بفكر فيه بحس إن مخي حيضرب  

وبعدين افتكر الآية دية فانبسط و استريح… (لَّقَدْ أَحْصَىٰهُمْ وَعَدَّهُمْ عَدًّۭا)